वाठार निंबाळकर हद्दीत भीषण कार अपघात; कमिन्सच्या तीन कामगारांचा मृत्यू, तिघे जखमी

 

फलटण चौफेर दि २४ जुलै २०२६:

 फलटण तालुक्यातील वाठार निंबाळकर हद्दीत झालेल्या भीषण कार अपघातात सुरवडी ता फलटण येथील कमिन्स कंपनीतील तीन कामगारांचा जागीच मृत्यू झाला, तर तिघेजण गंभीर जखमी झाले. भरधाव वेगामुळे चालकाचे वाहनावरील नियंत्रण सुटल्याने कार रस्त्यालगतच्या नाल्याच्या कठड्यावर आदळून पलटी झाल्याने हा अपघात घडल्याची माहिती पोलिसांनी दिली.

पोलिसांत दाखल फिर्यादीनुसार, 23 जुलै रोजी फिर्यादी व त्यांचे सहकारी काम आटोपल्यानंतर वाठार निंबाळकर येथील वसतिगृहात आले. रात्री सर्वजण कार  क्र एम एच १६ ए टी १७५६ मधून फलटण लोणंद पालखी महामार्गावरील एका हॉटेलमध्ये जेवणासाठी गेले होते. जेवणानंतर  ताथवडे घाट परिसरात फेरफटका मारून परत येत असताना सुरुवातीला फिर्यादी नयन लोंगाणी हे वाहन चालवत होते. त्यानंतर मोहम्मद हुसेन (रा. अयोध्या, उत्तर प्रदेश) याने वाहन चालविण्याची इच्छा व्यक्त केल्याने त्याच्याकडे वाहनाचा ताबा देण्यात आला.पुसेगाव–फलटण मार्गावर वाठार निंबाळकर हद्दीत आल्यानंतर भरधाव वेगामुळे वळणावर चालकाचा वाहनावरील ताबा सुटला. कार रस्त्याच्या उजव्या बाजूला जाऊन नाल्याच्या कठड्यावर जोरात आदळली आणि पलटी झाली. अपघातात वाहनातील सर्व प्रवासी गंभीर जखमी झाले.

अपघाताची माहिती मिळताच स्थानिक नागरिक, पोलिस व रुग्णवाहिका घटनास्थळी दाखल झाले. जखमींना तत्काळ फलटण येथील रुग्णालयात हलविण्यात आले. मात्र उपचारापूर्वीच मोहम्मद हुसेन (रा. अयोध्या, उत्तर प्रदेश), अनिल हेबरम (रा. जमशेदपूर, झारखंड) आणि सदानंद पुर्ती (रा. जमशेदपूर, झारखंड) यांचा मृत्यू झाल्याचे डॉक्टरांनी घोषित केले.या अपघातात नयन लोंगाणी, सौरभ कुमार (झारखंड) व एम. डी. सितारे (बिहार) हे जखमी झाले असून, सौरभ कुमार यांना पुढील उपचारासाठी बारामती येथे, तर एम. डी. सितारे यांना फलटण येथील खासगी रुग्णालयात दाखल करण्यात आले आहे.या प्रकरणी फलटण ग्रामीण पोलिस ठाण्यात संबंधित चालकाविरुद्ध निष्काळजीपणे व भरधाव वेगाने वाहन चालवून अपघात घडविल्याप्रकरणी गुन्हा दाखल करण्यात आला असून, पोलिस पुढील तपास करीत आहेत.