सुरवडी–साखरवाडी परिसरात बिबट्याचा वावर; बनकर वस्ती येथे प्रत्यक्ष दर्शन? नागरिकांमध्ये भीतीचे वातावरण

 

फलटण चौफेर दि ११ जुलै २०२६

 सुरवडी व साखरवाडी परिसरात गेल्या दोन दिवसांपासून बिबट्याच्या वावराच्या चर्चा सुरू असतानाच शनिवारी सायंकाळी बनकर वस्ती परिसरात बिबट्याचे प्रत्यक्ष दर्शन झाल्याने नागरिकांमध्ये भीतीचे वातावरण निर्माण झाले आहे. यामुळे शेतकरी व ग्रामस्थांनी सतर्कता बाळगण्याचे आवाहन वन विभागाने केले आहे.मागील दोन दिवसांपासून सुरवडी, साखरवाडी, खवळे वस्ती, बनकर वस्ती, १७ फाटा तसेच १५ फाटा परिसरात बिबट्या फिरत असल्याच्या तक्रारी नागरिकांकडून वन विभागाकडे करण्यात येत होत्या. मात्र त्यावेळी बिबट्याचे प्रत्यक्ष दर्शन झाले नव्हते. शनिवारी सायंकाळी बनकर वस्ती परिसरातील शेताच्या रस्त्यावर बिबट्या दिसल्याचे काही नागरिकाचे व प्रत्यक्षदर्शीचे म्हणणे असल्याने या तक्रारींना दुजोरा मिळाला आहे

बिबट्याचे दर्शन झाल्यानंतर परिसरातील शेतकरी, शेतमजूर तसेच नागरिकांमध्ये भीतीचे वातावरण पसरले आहे. रात्रीच्या वेळी शेतात जाणे, जनावरे चारण्यासाठी नेणे तसेच लहान मुलांना एकटे बाहेर पाठविणे टाळावे, असे आवाहन करण्यात येत आहे.

दरम्यान, वन विभागाने नागरिकांनी अफवांवर विश्वास न ठेवता सतर्क राहावे, रात्री एकटे फिरणे टाळावे आणि बिबट्या दिसल्यास तात्काळ वन विभागाशी संपर्क साधावा, असे आवाहन केले आहे.याचबरोबर सुरवडी व साखरवाडी परिसरातील शेतकरी व नागरिकांनी वन विभागाने तातडीने या परिसरात पिंजरा (सापळा) लावून बिबट्याला सुरक्षितरीत्या जेरबंद करावे, अशी मागणी केली आहे. वन विभागाच्या पुढील कार्यवाहीकडे परिसरातील नागरिकांचे लक्ष लागले आहे.