फलटण चौफेर, दि. १६ सप्टेंबर २९२५
शेतकऱ्यांची फसवणूक करून नेलेले तब्बल ६५ लाख रुपये किमतीचे दोन ट्रॅक्टर व एक पोकलैंड मशिन जप्त करण्यात फलटण शहर पोलिसांना मोठे यश मिळाले आहे. कर्नाटकातील आंतरराष्ट्रीय टोळीतील दोन संशयितांना अटक करून त्यांच्याकडून मुद्देमाल हस्तगत करण्यात आला आहे.
याबाबत फलटण शहर पोलीस स्थानकातून मिळालेली अधिक माहिती अशी,फलटण तालुक्यातील शेतकरी विनय संपत माने यांनी फेसबुकवर ट्रॅक्टर भाड्याने देण्याची जाहिरात केली होती. त्यावर कर्नाटकातील मुस्ताक मोहम्मद हुसेन या इसमाने राष्ट्रीय महामार्गाचे सरकारी काम असल्याचे सांगून दोन ट्रॅक्टर व एक पोकलैंड भाड्याने घेतले. मात्र, करारनुसार भाडे न देता मोबाईल बंद केला आणि खोटी वर्क ऑर्डर दाखवून ट्रॅक्टर व मशिन कर्नाटकमध्ये नेऊन विक्री केली.तक्रारीनंतर फलटण शहर पोलिसांनी सखोल तपास सुरू केला. संशयितांचा माग काढत पोलिसांनी महाराष्ट्र, कर्नाटक आणि मुंबईपर्यंत शोध घेतला. शेवटी मुस्ताक मोहम्मद हुसेन याला मुंबईतून तर त्याचा साथीदार इदमा हबीब रेहमान कुंजी बिहारी याला कर्नाटकातून अटक करण्यात आली. तपासात ही टोळी शेतकऱ्यांना खोट्या सरकारी वर्क ऑर्डर दाखवून ट्रॅक्टर, पोकलैंडसारख्या यंत्रसामग्रीची फसवणूक करून ती दुसऱ्या राज्यात विकत असल्याचे उघडकीस आले.
या कारवाईत दोन जॉन डिअर कंपनीचे ट्रॅक्टर व ल्यूगॉन्ग कंपनीचे पोकलैंड असा ६५ लाख रुपयांचा मुद्देमाल जप्त करण्यात आला आहे.ही धडक कामगिरी पोलीस अधीक्षक तुषार दोशी, अपर पोलीस अधीक्षक डॉ. वैशाली कडुकर, उपविभागीय अधिकारी विशाल खांबे यांच्या मार्गदर्शनाखाली पोलीस निरीक्षक हेमंतकुमार शहा, पो.उ.नि. विजयमाला गाजरे, सहाय्यक पो.उ.नि. संतोष कदम, अंमलदार पूनम बोबडे, काकासो कर्णे, अतुल बडे व जितेंद्र टिके यांनी केली.
.jpeg)
