फलटण चौफेर दि ३ : सातारा - लोणंद राज्य मार्गावरील देऊर (ता. कोरेगाव) येथील रेल्वे फाटक क्रमांक ४७ हे आजपासून तीन दिवसांसाठी बंद करण्यात येणार असल्याची माहिती रेल्वे विभागाकडून देण्यात आली आहे. देऊर रेल्वे फाटक क्रमांक ४७ हे रेल्वे रुळाच्या दुहेरीकरण व दुरुस्तीसाठी तसेच निरीक्षणासाठी सोमवार, दि. ३ जून रोजी सकाळी ७ वाजल्यापासून ते बुधवार, दि. ५ जून रोजी सायंकाळी सात वाजेपर्यंत वाहतुकीसाठी बंद ठेवण्यात येणार असल्याचे रेल्वेच्या अधिकाऱ्यांनी सांगितले. फाटक बंद असलेल्या तीन दिवसांत सातारा ते लोणंद या मार्गावरील वाहतुकीत बदल करण्यात आला आहे. यानुसार लोणंद व फलटणकडून साताराकडे जाणारी सर्व प्रकारची वाहने वाठार स्टेशनमधून पिंपोडे बुद्रुक दहिगाव देऊर किंवा वाघोली- अनपटवाडी मार्गे अंबवडे चौकातून सातारा दिशेने जातील. वाठार स्टेशनकडून कोरेगावला जाणारी सर्व प्रकारची वाहने तळीये बिचुकले- गुजरवाडी- पळशी मार्गे पुढे जातील. तसेच सातारा बाजूकडून लोणंदला जाणारी वाहने अंबवडे चौकातून अनपटवाडी वाघोली पिंपोडे बुद्रुक वाठार स्टेशन या मार्गावरून जातील. सर्व वाहनधारकांनी तीन दिवसांसाठी वरील पर्यायी मार्गाचा अवलंब करून सहकार्य करावे, असे आवाहन रेल्वे विभागाकडून करण्यात आले आहे.
.jpeg)
