फलटण तालुक्यातील पशुपालकांनी जनावरांचे ईअर टॅगिंग तत्काळ करावे १ जून नंतर टॅगिंग नसलेल्या जनावरांच्या खरेदी विक्रीवर येणार निर्बंध

 

फलटण चौफेर दि २०फलटण तालुक्यातील पशुपालकांनी त्यांच्या पशुधनाचे ईअर टॅगिंग तात्काळ करून घेण्याचे आवाहन पशुसंवर्धन विभाग पंचायत समिती फलटण यांच्या वतीने करण्यात आले आहे त्यानुसार, पशुसंवर्धन विभागाद्वारे पशुपालक यांच्याकडे असलेले पशुधन याची नोंदणी नॅशनल डिजिटल लाईव्हस्टॉक मिशन (NDLM) अंतर्गत "भारत पशुधन" या प्रणालीवर केली जात आहे. सदर प्रणाली मध्ये नोंदणी करण्यासाठी ईअर टॅगिंग (12 अंकी बारकोड) केले जात असून पशुधनाची सर्वकष नोंदी त्यामध्ये नोंदविल्या जात आहेत. यामध्ये जन्म-मृत्यू नोंदणी, लसीकरण, औषधोपचार, मालकी हस्तांतरण इत्यादी बाबींचा समावेश आहे.

पशुधनाच्या कानात बिल्ले मारून पशुधनाचे लसीकरण, प्रजनन, उपचार, खरेदी-विक्री इत्यादी सर्व नोंदी घेतल्यामुळे वास्तवकालीन माहितीसाठा तयार होण्यास मदत होणार आहे. या माहितीकोषाच्या आधारे शेतकयांना, पशुपालकांना शासनाच्या सुविधा, योजना आणि पशुधनासाठी आवश्यक असलेल्या सेवांचा लाभ घेण्यासाठी मदत होणार आहे. पर्यायाने पशुधनाच्या उत्पादकतेत वाढ होऊन पशुपालकांचा आर्थिक स्तर उंचावण्यास मदत होणार आहे.

सर्व पशुधनाची सर्वंकष माहिती एका ठिकाणी उपलब्ध होऊन संभाव्य साथीच्या रोगाचे अंदाज, त्या दृष्टीने करावयाच्या उपायोजना यांचे नियोजन करणे, पशु व पशुजन्य उत्पादनात वाढ करण्याच्या दृष्टीने राज्यातील सर्व पशुधनाचे ईअर टॅगिंग करून त्याची नोंदणी भारत पशुधन या प्रणालीवर करणे शासन निर्णयानुसार बंधनकारक करण्यात आलेले आहे.

दिनांक ०१/०६/२०२४ नंतर ईअर टॅगिंग शिवाय व त्याची नोंद प्रणालीवर झाले नसल्यास पशुधनाची खरेदी विक्री करता येणार नाही,पशुवैद्यकीय संस्था अथवा दवाखान्यांमधून पशुवैद्यकीय सेवा देय होणार नाहीत,नैसर्गिक आपत्ती, विजेचा धक्का तसेच वन्यपशुंच्या हल्ल्यामुळे मृत्युमुखी पडलेल्या पशुधनास ईअर टॅगिंग शिवाय नुकसान भरपाई रक्कम देय होणार नाही,विक्री करिता वाहतूक करण्यात येणाऱ्या पशुधनाची नोंद नसल्यास वाहतूक प्रमाणपत्र आणि आरोग्य प्रमाणपत्र अदा केले जाणार नाही. पशुधनाची वाहतूक ईअर टॅगिंग असल्याशिवाय करता येणार नाही,ईअर टॅगिंग नसलेल्या पशुधनाची बाजार समिती, आठवडे बाजार व गावागावातील खरेदी-विक्री करण्यास प्रतिबंध करण्यात येणार आहे पशुधनाच्या मालकी हस्तांतरण (Owner Transfer) बाबतच्या नोंदी संबंधित पशुवैद्यकीय अधिकायांकडून त्वरित अद्ययावत करून घेण्याची जबाबदारी संबंधित पशुपालकांची राहील.वास्तवकालीन माहिती साठा तयार करणे, पशुधनाच्या सुलभ नोंदी ठेवून पशु उत्पादनात वाढ, शासनाच्या सुविधा, विविध योजना या बाबींसाठी तालुक्यातील सर्व पशुपालक यांनी आपले पशुधनास नजीकच्या पशुवैद्यकिय दवाखान्यामार्फत ईअर टॅगिंग करून त्याची नोंद प्रणालीवर करून घ्यावी असे आवाहन पशुसंवर्धन विभाग पंचायत समिती फलटण यांचे कडून करण्यात आले आहे.