साखरवाडी(गणेश पवार)
फलटणचे ग्रामदैवत श्री काळभैरवनाथ श्री जोगेश्वरी मंदिर, भैरोबा गल्ली, येथे मंदिर जिर्णोद्धार लोकार्पण आणि कलशारोहण सोहळा सोमवार, दि.२७ मार्च रोजी दुपारी १२.३६ वाजता विधीवत करण्यात येणार असून भाविकांनी उपस्थित राहुन लाभ घ्यावा, असे आवाहन श्री भैरवदेव देवस्थान ट्रस्ट, फलटणच्या वतीने करण्यात आले आहे.
महाराष्ट्र विधान परिषद माजी सभापती आ.श्रीमंत रामराजे नाईक निंबाळकर यांचे शुभहस्ते जिर्णोद्धार लोकार्पण आणि कलश पूजन होणार असून त्यानंतर श्री सेवागिरी महाराज देवस्थान, पुसेगावचे मठाधिपती १०८ प.पू.श्रीमहंत श्री सुंदरगिरीजी महाराज यांच्या शुभहस्ते कलशारोहण होणार आहे. फलटण-कोरेगाव विधानसभा मतदार संघाचे आमदार दिपकराव प्रल्हाद चव्हाण समारंभाचे अध्यक्षस्थान भूषविणार आहेत.
कृषी उत्पन्न बाजार समिती फलटणचे माजी चेअरमन श्रीमंत रघुनाथराजे नाईक निंबाळकर, सातारा जिल्हा परिषद माजी अध्यक्ष श्रीमंत संजीवराजे नाईक निंबाळकर, फलटण पंचायत समिती माजी सभापती श्रीमंत विश्वजीतराजे नाईक निंबाळकर विशेष अतिथी म्हणून उपस्थित राहणार आहेत.
सोमवार, दि.२७ मार्च रोजी सकाळी ०८ ते दुपारी १२.१५ वाजेपर्यंत वेदशास्त्र संपन्न, मुख्य पुरोहित चंदूकाका वादे व इतर ब्रह्मवृंद यांचे पौरोहित्याखाली श्री गणपती पूजन, पुण्याहवाचन, होमहवन हे धार्मिक विधी संपन्न होतील.
दुपारी १२.३६ वाजता श्री काळभैरवनाथ श्री जोगेश्वरी. मंदिराचा कलशारोहण सोहळा, आरती, सत्कार समारंभ, मनोगत व आभार प्रदर्शन होईल.
भैरोबा गल्ली, फलटण परिसरातील माहेरवाशीण यांचा यथोचित सत्कार आणि महाप्रसाद असा कार्यक्रम होणार आहे.
फलटण पंचक्रोशीसह तालुक्यातील भाविकांनी या सोहळ्यात सहभागी व्हावे, असे आवाहन श्री भैरवदेव देवस्थान ट्रस्टचे अध्यक्ष ॲड.अशोकराव जाधव, उपाध्यक्ष प्रदीप पवार, नंदकुमार घारगे, अरुण आंबोले, मधुकर आंबोले, अनंत भोंसले, संजय पालकर, अविनाश पवार, रामदास पवार, गोरख पवार, शाम कापसे, भाऊ कापसे, रामचंद्र भोसले, संजय डमकले, राजेंद्र भांडवलकर विश्वस्त मंडळाने केले आहे.
.jpeg)
