फलटण चौफेर दि २९ ऑक्टोबर २०२५
फलटणमध्ये घडलेल्या महिला डॉक्टर आत्महत्या प्रकरणात आज नवे वळण आले आहे. हॉटेल मधुदीप चे प्रमुख दिलीपसिंह भोसले यांनी पत्रकार परिषद घेत या प्रकरणाबाबत सविस्तर खुलासा केला असून, कागदोपत्री पुरावे सादर करत सर्व आरोप फेटाळले आहेत. या पत्रकार परिषदेला तेजसिंह भोसले आणि रणजितसिंह भोसले उपस्थित होते.भोसले यांनी सांगितले की, “दि. २३ ऑक्टोबर रोजी रात्री सुमारे १.३० वाजता सदर महिला डॉक्टर दुचाकीवरून हॉटेलच्या गेटवर आली. तिने बारामतीला जायचे असल्याचे सांगत रुमची मागणी केली. वॉचमनने तिला आत घेतल्यानंतर ती थेट रिसेप्शनकडे गेली. तिने स्वतःच्या हाताने रजिस्टरमध्ये नाव लिहिले आणि आधारकार्ड दिले. त्यानंतर रुमची चावी घेऊन ती स्वतःच रुममध्ये गेली.ते पुढे म्हणाले की, “महिला रात्री उशिरा आल्यामुळे सकाळी हॉटेलकडून चहा-पाणी इत्यादीसाठी दार ठोठावले गेले नाही. मात्र दुपारी १२ नंतर प्रतिसाद न मिळाल्याने कर्मचाऱ्यांनी संपर्क करण्याचा प्रयत्न केला. प्रतिसाद न मिळाल्याने सायंकाळी ६.३० वाजता पोलिसांना माहिती देण्यात आली. त्यानंतर दार उघडण्यात आले असता ती गळफास घेतलेल्या अवस्थेत आढळली. त्यानंतरचा संपूर्ण तपास पोलिसांनी हाती घेतला.”
भोसले यांनी स्पष्ट केले की, “घटनेचा संपूर्ण सीसीटीव्ही फुटेज पोलीस प्रशासनाला दिला आहे. त्या फुटेजनुसार महिला रुममध्ये गेल्यानंतर इतर कुणीही व्यक्ती आत प्रवेश केलेली नाही. गेल्या ३२ वर्षांच्या हॉटेलच्या इतिहासात असा प्रकार कधीही घडलेला नाही. सज्ञान व्यक्तीला रुम देणे हे हॉटेलचे कायदेशीर कर्तव्य आहे.”शिवसेना नेत्या सुषमा अंधारे आणि जयश्री आगवणे यांनी हॉटेलवर केलेल्या आरोपांबाबत प्रतिक्रिया देताना भोसले म्हणाले, “आमच्यावर केलेले आरोप पूर्णपणे निराधार आहेत. आम्ही सर्व पुरावे पोलिसांना सुपूर्द केले असून तपासाद्वारे सत्य नक्कीच समोर येईल,” असे त्यांनी सांगितले.या खुलाशामुळे महिला डॉक्टर आत्महत्या प्रकरणाचा तपास नव्या दिशेने वळण्याची शक्यता वर्तवली जात आहे. फलटण पोलिसांनी हॉटेलमधील सर्व कागदपत्रे, सीसीटीव्ही फुटेज आणि स्टाफची चौकशी सुरू केली असल्याची माहिती पोलिस सूत्रांकडून मिळाली आहे.
.jpeg)
