वेश्या व्यवसायासाठी जबरदस्ती नेणाऱ्या दोन महिलांची सुटका : दोन सराईतांना अटक

 

फलटण चौफेर दि. १७ सप्टेंबर २०२५

 वेश्या व्यवसायाच्या जाळ्यात अडकवण्यासाठी जबरदस्तीने दोन महिलांना चारचाकी गाडीतून नेत असताना वडगाव निंबाळकर पोलिसांनी मोठी कारवाई करत महिलांची सुटका केली आहे. या प्रकरणी दोन सराईतांना अटक केली आहे. त्यांच्याकडील स्विफ्ट गाडी (क्र. एम एच ११ एमडी ८०५५) जप्त करण्यात आली आहे. ही कारवाई दिनांक १५ सप्टेंबर २०२५ रोजी करंजेपूल बस स्टॉप परिसरात करण्यात आली. सदर परिसरात पोलिस पथक पेट्रोलिंग करीत असताना लाल रंगाची काळ्या काचा असलेली संशयित गाडी फिरत असल्याची माहिती मिळाली. लगेचच पोलिसांनी नाकाबंदी करून गाडीला थांबवले. पाहणी केली असता गाडीत दोन पुरुष आणि दोन महिला आढळून आले. त्यांची चौकशी महिला पोलीस कर्मचाऱ्यांच्या उपस्थितीत करण्यात आली. चौकशीत पीडित महिलांनी सांगितले की, त्यांना पैशाचे आमिष दाखवून पुण्यातील हडपसर येथून बेकायदेशीर पद्धतीने लोणंद येथे आणले होते. आरोपी त्यांना जबरदस्तीने वेश्या व्यवसायात ढकलण्याचा प्रयत्न करत होते. याआधीही त्यांना अशाच प्रकारे लोणंद परिसरात आणून अवैध व्यवसाय करण्यास भाग पाडण्यात आले होते. या प्रकरणी पोलिसांनी दोन आरोपींना अटक केली आहे. सुयोग हिंदुराव खताळ (रा. कापडगाव, लोणंद ता. फलटण, जि. सातारा) व प्रीतम आप्पासाहेब घुले (रा. कापडगाव, लोणंद ता. फलटण, जि. सातारा) यांच्यावर गुन्हा दाखल करण्यात आला आहे. पोलिसांच्या प्राथमिक तपासानुसार या प्रकरणातून आणखी मोठे रॅकेट उघड होण्याची शक्यता वर्तवली जात आहे. ही कारवाई संदीपसिंह गिल्ल (पोलीस अधीक्षक, पुणे ग्रामीण) गणेश बिरादार (अप्पर पोलीस अधीक्षक, बारामती विभाग) व सुदर्शन राठोड (उपविभागीय पोलीस अधिकारी, बारामती उपविभाग) यांच्या मार्गदर्शनाखाली पार पडली. कारवाईत पोलिस निरीक्षक विलास नाळे, सहाय्यक पोलीस निरीक्षक नागनाथ पाटील, पोलीस उपनिरीक्षक राहुल साबळे, श्रेणी पोलीस उपनिरीक्षक डी. एस. वारुळे, पोलीस हवालदार अमोल भोसले, तसेच एस. पी. देशमाने, रमेश नागटिळक, कुंडलिक कडवळे, पोपट नाळे, निलेश जाधव व नागनाथ परगे यांनी विशेष परिश्रम घेतले.