सातारा जिल्हा परिषद व ११ पंचायत समित्यांच्या प्रभागरचनेचा मसुदा प्रसिद्ध — हरकती व सूचना २१ जुलैपर्यंत सादर करण्याचे आवाहन

 

सातारा, दि. १३ (जिमाका)

सातारा जिल्हा परिषद व ११ पंचायत समित्यांच्या निवडणुकीसंदर्भात भौगोलिक प्रभागरचना निश्चित करण्यासाठी प्रारूप मसुदा सोमवार, दि. १४ जुलै २०२५ रोजी प्रसिद्ध करण्यात येणार आहे. महाराष्ट्र शासनाच्या आदेश क्र. जिपनि-२०२५/प्र.क्र.३६/पं.रा-२ दिनांक १२ जून २०२५ अन्वये ही प्रक्रिया राबवण्यात येत आहे.प्रारूप प्रभागरचना जिल्ह्यातील सर्व संबंधित तहसिल कार्यालये, पंचायत समिती कार्यालये, जिल्हा परिषद कार्यालय व जिल्हाधिकारी कार्यालय सातारा येथे नागरिकांना पाहण्यासाठी उपलब्ध करून देण्यात आली आहे.

या प्रारूप रचनेबाबत नागरिकांना काही हरकती अथवा सूचना असल्यास त्या कारणासह लेखी स्वरूपात संबंधित तहसिलदार कार्यालयात दिनांक २१ जुलै २०२५ पर्यंत सादर कराव्यात, असे आवाहन उपजिल्हाधिकारी (महसूल) श्री. विक्रांत चव्हाण यांनी केले आहे.तहसिलदारांकडे २१ जुलैनंतर प्राप्त होणाऱ्या हरकती व सूचना विचारात घेतल्या जाणार नाहीत, असेही त्यांनी स्पष्ट केले आहे.