८ लाख व त्यापेक्षा कमी उत्पन्न असलेल्या कुटुंबातील मुलींना १००% शैक्षणिक शुल्क माफ - चंद्रकांत पाटील

तरडगाव (नवनाथ गोवेकर)

महाराष्ट्रात शिक्षण क्षेत्राची गंगा घरोघरी पोहचावी यासाठी विद्यमान सरकारने विविध कल्याणकारी योजना राबवून अनेक लोकाभिमुख निर्णय घेतले आहेत. याचाच भाग म्हणुन, राज्यात मुलींचा शैक्षणिक टक्का वाढावा यासाठी महाराष्ट्रात आठ लाख रुपये किंवा त्यापेक्षा कमी उत्पन्न असलेल्या कुटुंबातील मुलींचे शैक्षणिक शुल्क माफ केले जाणार असल्याचा निर्णय घेण्यात आला आहे.  या कुटुंबातील मुलींची फी भरण्याची जबाबदारी महाराष्ट्र सरकार घेणार असल्याचे उच्च व तंत्रशिक्षण मंत्री चंद्रकांत पाटील यांनी जाहीर केले. या निर्णयामुळे उच्च शिक्षणात मुलींचा सहभाग वाढेल. सध्या मुलींना शैक्षणिक शुल्कात ५० टक्के सूट दिली जात होती. मात्र, आता ही सूट १०० टक्के करण्यात आली आहे. त्यामुळे आता आठ लाखांपेक्षा कमी उत्पन्न असलेल्या कुटुंबातील मुलींना मोफत शिक्षण मिळणार आहे. तसेच, या निर्णयामुळे उच्च शिक्षण घेऊ इच्छिणाऱ्या मुलींना फायदा होणार असून मुलींची विद्यापीठातील प्रवेश संख्याही वाढेल असा विश्वास वाटतो. महाराष्ट्रात विविध क्षेत्रांमध्ये परिवर्तन व्हावे यासाठी विद्यमान सरकार कटिबद्ध आहे. येत्या काळातही  आमचे सरकार तरुणांचे उज्ज्वल भविष्य याकडे विशेष लक्ष केंद्रीत करेल असा विश्वास मंत्री चंद्रकांत पाटील यांनी व्यक्त केला.